May sariling mundo ang Kilapsaw ni Ellen Sicat na nasa kategorya ng young adult fiction. Gaya ng mga romansa at erotika, may mga panuntunan itong sinusunod, tahasan mang aminin o hindi, upang maging kalugod-lugod sa mga sumusubaybay; ergo, para maging mabenta. Nasa kategoryang ito ang Kilapsaw. Sa hagod at himig, pati na sa pagkakakipil at sa haba, ay young adult readers ang pinupuntirya nito. Pero may isang aspekto itong bumabalikwas. Ipinaaalala nito ang isang publikasyong naglabas ng mga nobela noong mga unang taon ng dekada nobenta, nang kasagsagan pa ng paglalathala ng mga nobelang romansa sa Pilipinas. Sa halip na sundan ang formula ng pag-iibigang tumutuhog sa nobelang romansa, lumihis ng landas ang mga nasabing nobela. Nakakanlong man sa hulma ng romansa, hindi pag-iibigan kundi mga realidad ng buhay pag-ibig ang tinalakay ng mga akda, gaya ng domestic violence, marital rape, at iba pang paraan ng pandarahas sa kababaihan. Layunin ng mga nobelang iyon na maantig ang kamalayan ng mga mambabasang babaeng nasa katulad na kalagayan, sa pagbabaka-sakaling makalaya ang mga ito. Masasabing lumilihis sa karaniwang nobelang young adult ang Kilapsaw, kahit pa nasa molde ito ng nabanggit. Ang mga realidad ng mga komplikasyon ng pakikipagrelasyon, ng kasarian, at iba pang maliliit na detalye ng buhay ang tuon nito. Hindi ito simpleng feel-good na babasahin. May sarili itong boses na nag-aanyaya mang basahin ay nag-aanyaya rin ng paglilimi. Rosa May Bayuga
Author: Ellen Sicat
ISBN/ISSN: 978971542960-3
Category: Literary; Fiction
Copyright: 2021
Pages: 220
Size: 6x9
Type: PB/SP