Hindi kailangang maging Superfan ng mga palabas na pinagbasehan ng mga akda na nakapaloob sa koleksiyong ito upang maging tunay na fan ng tula at panulat ni Gonzales. Mula sa mga binhi ng Naruto, Gundam, Fullmetal Alchemist atbp., tinutubuan na ang mga likhang sining na ito ng sariling mga ugat sa damdamin, diwa, at pulitika na makapagpapalaya ng imahinasyon at pagkatao ng mambabasa.
— Ramon Guillermo

Kung ang pagsulat ay muling pagbasa, ang pagbasa sa Mga Tala ng Isang Superfan ay kakaibang karanasan. Hitik sa kasiyahan dulot hindi lamang ng husay ng paglalaro at paglalapat kundi pati ng imbitasyon ng wika na usisain ang ulirat. May sundot ang bawat akda, may kirot, may hinagpis, may pag-ibig. Sa librong ito ay may halaga si Dennis, si Ranma, sina Al at Ed, si Pain; mahalaga ang mga robot at palasyo sa himpapawid, ang pagbubukas ng mga lagusan at alaala, ang mahika, ang iba't ibang kamalayan at teknolohiya, ang mga uri ng paglaban, ang mga mukha ng sakit at kapangyarihan.
— Anna Felicia C. Sanchez

Kailangang fan kayo ng kung ano ang pagiging fan ni Vladimeir Gonzales para malaman na ang fan ay hindi lang fan kundi trespasser, tagalabag, tagahubog ng alternatibong mundo at karanasan. Tulad ng graffiti sa pader at toilet na ang nakasulat o pinta ay paglabag sa batas ng maayos na siyudad o pribadong pag-aari, ang fan lit ay pagkuwestiyon sa awtoridad, pag-angkin sa inaakdang espasyo at sandali, paghimok ng pagbabago. Sa Mga Tala ng Isang Superfan, matutunghayan ang kaibang uri ng panitikang nanghihimok—kasama ang mag-Google Search—at nambabastos sa mga sagrado’t nagdadambana sa mga bastos.
— Rolando B. Tolentino

Author: Vladimeir B. Gonzales
ISBN/ISSN: 978971542883-5
Category: Literary; Poetry; Fiction
Copyright: 2019
Pages: 124pp
Size: 8x5
Type: PB/SP