Ito ay naglalaman ng mga eksenang nagaganap sa mga paupahang bedspace, kuwarto, studio, apartment, at condo. Ang bawat taong sentro ng kuwento ay halaw sa pinagsama-samang karakter na nakilala at nakasama ng sumulat. Narito rin ang ilang personal na kuwento ng may-akda bilang isang batang nakitira at nanilbihan sa mahabang listahan ng mga kamag-anak at kakilala.

Ang Boarding House ni Jaileen Jimeno ay hindi temporal na estasyon ng mga panandaliang-pagtira, tulog, kain, bisyo, at libog. Lunan itong nanahan sa kanyang pagkatao na may tagal nang pananatili at habambuhay na pag-iral sa kanyang kalooban at mga pagpapakahulugan sa buhay. Materyal ang koleksiyon ng mga personal na sanaysay na ito ni Jimeno para ituon ang ating mga pansin sa dalawang lakas ng naturang genre: Ang head-on collision at confrontation sa mga pagkakasala, kahinaan, kapalpakan, at pagkasubsob sa buhay na hindi maiiwasang ikumpisal ng gunita subalit mas nagpabangon sa manunulat—dahil hindi naman siya nagwala, nawala, at napariwara bilang tao; at ang pagbuo sa naratibo ng sariling buhay na hindi hiwalay sa mga buhay ng mga taong nakasama sa bawat personal na karanasang itinatanghal. Hindi madaldal ang naratibo ni Jimeno pero marami itong sinasabi at marami pa itong nais sabihin. Tiyak na matapos nating mabasa ang buong koleksiyon, itong “marami pang nais sabihin” ay iaatang natin sa ating mga sarili bilang pag-angkin natin sa bawat kuwento, sa bawat karanasan, sa lahat ng makikilala nating pagpapakahulugan.
—Ferdinand Pisigan Jarin

Para akong bagong boarder. Isa-isang ipinakikilala ni JJ Jimeno ang makakasama ko sa temporal na tagpuan at panahunan. Karikatura ng buhay. Pumipintig. Nanunumbat. Nagmamahal. Ilang David, Mama Rosa, Chloe, Matty pa ba ang mayroon tayo? Narito sa kalipunan ng narasyon ni JJ Jimeno ang nananampal na imbentaryo at katalogo ng buhay-buhay.
—Joselito D. De Los Reyes

Ang birtud ng koleksiyong ito na siya ring taglay ng lahat ng mga kuwentong masarap basahin at balikan ay ang kakayahang gawing pambihira ang karaniwan at pangkaraniwan ang pambihira. Sa pagsasalaysay ng salimbayan ng mga buhay na nagsasalubong at nagsasalabid, tila sinasabi sa atin ni JJ Jimeno na tayong lahat, tulad niya, ay isang “boarder forever.”
—Chuckberry J. Pascual